ТАРИХ ФАКУЛЬТЕТІ

1938 жылы құрылған көне факультеттердің бірі. Факультет тарих, археология, этнология және халықаралық қатынастар саласында бәсекеге қабілетті, кәсіби қызмет саласында шығармашылық ойлау қабілеті мен ұтқырлығы бар жоғары білікті мамандар даярлаумен айналысады. Факультет бакалавриат, магистратура және докторантура бағдарламаларын ұсынады. Барлық деңгейлерде көптілді білім беру бағдарламалары енгізілген. «Халықаралық қатынастар» мамандығы бойынша студенттер екі шет тілін терең меңгереді.

Тарих факультетінің түлектері мектептерде, колледждерде, жоғары оқу орындарында тарих пен әлеуметтік-саяси пәндерден сабақ бере алады, ғылыми мекемелерде, музейлерде, мұрағаттарда, экскурсиялық және туристік бюроларда, білім департаменттерінде қызметкерлер болып жұмыс істей алады.

Факультетте үш кафедра бар: археология, этнология және Отан тарихы кафедрасы, бүкіләлем тарихы және халықаралық қатынастар кафедрасы, Қазақстан тарихы және Қазақстан халқы Ассамблеясы кафедрасы.

Факультет Қазақстанның танымал ғылыми орталығы болып табылады. Ғылыми мектептер үш ғылыми орталық: этномәдени және тарихи-антропологиялық зерттеулер орталығы, «Тұлғатану» ғылыми-зерттеу орталығы және Сарыарқа археологиялық институты базасында құрылған.